Saturday, October 8, 2011

ඉතින් කවදාද මා යන්නේ ????


නුහුරු නුපුරුදු මුහුණු පිරි දුර දේශයක

මා තනිවූ කාලයේ පාළුවිය ජීවිතය

හිනැහුනෙමි සතුටට නොව මගෙ පාළුවට

ඇඬුවෙත් මා එදා හිතින් මගෙ තනිකමට

එනමුත් නොසිතූ ලෙස මට හමුවූ නුඹව

රැඳුනු හැටි පුදුමයි මගේ හිත ගැඹුරේම

හිතට හුරු වූ ඔබේ රුව නොදකින කලට

දැනුනි දුක් වේදනා තනිකමට අමතරව

වෑයම් කලත් මම අද තනිව හිනැහෙන්න

නැහැ දැන් ඉඩක් මට හැඬුනොත් මිස තනිව

සිටියත් මා වටා දහස් ගණනක් සෙනඟ

හැඟෙන්නේ තනිකමයි නිතර නිතරම සිතට

හේතුවක් හොයන්නට වීරිය කල මෙමට

පසක් විය සැනෙන් මට අහිමි බව මගේ හද

හද අහිමි මම කෙලෙස හිනැහෙන්නද තනිව

ඉතින් කවදාද මා යන්නේ ඇය දකින්නට

දොඩමළුව ඈ සමඟ හිනැහෙමින් ඇවිදින්න

? ? ? ? ? ? ? ? ? ? ? ? ? ? ? ? ? ? ? ? ?

Saturday, June 18, 2011

මව මෙන් පියත් මතු දිනයක බුදු වන්න





මව මෙන් නොදැරුවත් දරුවන් තම කුසයේ
දරු හැඬුමකට කිරි නොවුනත් ගත රුහිරේ
පිටතට නොපෙනුනත් හද පිරි දරු සෙනෙහේ
පිය සෙනෙහසට සීමා බැමි නැත තැනුනේ


සීමා පවුරු නැති ඒ දරු සෙනෙහෙ නිසා
තම ගත සවිය ඩා බිඳු ලෙස දිය කෙරුවා  
දූදරුවන්ගේ හෙට ලෝකය ගැන සිතලා
තම සැප සතුට සහ සැනසුම කැපකෙරුවා


අපගේ දිවිය වට කොට මහමෙර විලසේ
නැගුනේ ඔබයි රැකවල් යොදවා රිසිසේ
ඒ රැකවල් මැදින් ආ දූ දරු කැල සිත්සේ
හිනැහෙන අයුරු දකිනා පියවරු සැනසේ


මව් පිය දෙපල ඉර හඳ මෙනි දරුවන්ට
ඒ ඉර හඳ සෙවන යට දරුවනි සැනසෙන්න
මව මෙන් පියා නැතිනම්  දරුවන්  අසල
උන්ගේ ලොවට හිරු එළියක්‌ නම් නොමැත


අම්මා වගේ ළඟ හිඳ සෙනෙහස නොමපා
ජිවිත සටනේ පෙරමුණ ගෙන ගුටි බැටකා
ඒ කම්කටොලු මැද හිඳ දූ දරුවන් සනසා
හිනැහෙනු දුටිමි පියවරු කඳුලැල් සගවා


නිතරම දෙසවනේ වැකුණේ මව් ගුණය
පිය සෙනෙහසත් මව් හට නොදවෙනි තැනය
පියවරු කරන කැප කෙරුමට තුති දෙන්න
මව මෙන් පියත් මතු දිනයක බුදු වන්න

Tuesday, May 17, 2011

ත්‍රී විල් පටලැවිල්ල

සිදුවූ සිද්ධියකි මෙය මගේ                මිතුරෙකුට
හැඩ වැඩ දමා ගොතනෙමි එය           කවියකට
ඔහුගේ රෝද තුන යොමුකර                මාවතට
සෙව්වා මුදල් ගොස් ගමනක්             කුලියකට


ත්‍රී විල් රියදුරෙකි ඔහු පෙර කී               ලෙසට
හිත හොඳ නිසා නිතරම ගමනේ              යසට
හිතවත් කෙනෙක් ඇවිදින් දවසක්            ඔහුට
ඇසුවා යන්න දුර ඇති                  අවමඟුලකට


රෑ බෝවෙලයි වෙන්නෙ අපහට              යන්ට
අවුලක් නෑ නේද මල්ලියේ එය               උඹට
හිතවත් මිතුර කීවා පහදා                     මොහුට
නෑ බෑ බසක් කවදත් නැතිවිය                 ඔහුට


දෙදෙනා ගියා රෑ බෝවී                     මළගමට
මහා රෑ යාමේ පිටවුනි ආපසු                   එන්ට
ආවත් දෙදෙනා මහා රෑ වීරයෝ            ලෙසට
පාලුයි පාර ඇත ජරමර මඟ                     දිගට


හදවත දෙගිඩියාවෙන් පිරුණත්              බයට
අතහැර දමා බිය දෙදෙනා එන               කලට
දුටුවා ලියක් ඉන්නා බැස මහ                 මඟට
සිහිවුනි දෙවියෝ අසුවූ විට මෙය            ඇසට


මෝහිනි නමැති හොල්මන සිහිවිය         මුන්ට
දෙදෙනා බියවෙලා සැරසෙයි පැන         යන්ට
මොනවා වුනත් හරි නෑ දෙදෙනාගේ       හිතට
කෙල්ලෙක් නිසා හිත නෑ මඟහැර          යන්ට


මහා රෑ ලෙඩක් හෝ කරදරයක්               කාට
විය හැක මිතුර හොඳ නෑ කර ඇර           යන්ට
හිතුවා දෙදෙන රිය නවතා                  විමසන්ට
හනිකට බ්රේක් ගැසුවා මිතුරා                  තදට


ඔහුගේ රථය නවතන ඒ                    ඇසිල්ලට
දිවවිත් කෙල්ල නැවතූ මේ රිය               දෙසට
ගොඩවූවාලු  සමඟින් මල්ලක්                 බරට
බිය වී ඩා බිඳුත් නැගුනලු                  දෙදෙනාට


ත්‍රී විල් මිතුරා සමගින් ගිය                    අනිකාට
ආවේ නැතිලු වචනත් එවෙලේ              හොඳට
වෙහෙසක් දරා දිරි ගෙන දෙදෙනා            හිතට
හිතුවලු මොකක්දෝ මේ වෙන්නේ           අපට


දිව ආ අඟන තබලා මල්ලත්                    හැඩට
උස්සා ඔලුව වටපිට බලනා                      කලට
බියවුන දෙදෙන සැනෙකින් නෙත     ගැටුනවිට
බෙරිහන් දෙමින් පැන්නලු රථයෙන්         බිමට


බය දෙදෙනාගේ දෙපිටින් ගියේ මර         හඬට
දමලා ඇගේ බෑගය විගසින්                      බිමට
ආවලු පාගලා අපේ මිතුරා                       හැටට
නැවතුනේ ආව පසුවලු දෙදෙනම            ගමට


අවදිව ඊට පසු දින උදයම                     මොහුට
ඕනෑ වුනා සිදුවුන දේ දැන                       ගන්ට
ගත්තා ඇමතුමක් ඔහුගේ                   මිතුරෙකුට
මිතුරා සිටියේ කිට්ටුව ඒ                        මාවතට


හලෝ මචං කොහොමද කොල්ලෝ          උඹට
මාර වැඩක් සිදුවුනි ඊයේ                         මෙමට
එනවිට උඹේ ගේ අසලින් රෑ                   දෙකට
දුටුවෙමි ගෑනියක් හිටියා බැස                    මගට


නැවතූ විටදි ඇය කවුදැයි                     විමසන්ට
දුවගෙන ඇවිත් ඈ ගොඩ විය මගේ             රියට
බයවුනු අපිත් ඇරලා ආවා                        හැටට
සිදුවුනු දෙයක් ඇත්නම් කියපන්               මෙමට


සිනහා නගා මිතුරගේ මිතුරා                       තදට
උණු උණුවේම ලැබුනා පුවතක්                   අපට 
නෑ කිසි දෙයක් උඹලට නම් බය               වෙන්ට
කීවා පහදලා වුන දේ රෑ                           දෙකට


අපගේ අසල්වැසි ඇසිලින්                     අක්කාට
හිටියා දුවක් තරමක් පෙනුමයි                   ඇහැට
ඊයේ රැයේ ඈ පැන ගොස් ඇති                   බවට
පැතිරී ගියා රාවය ගම හැම                        තැනට


උඹලා එද්දී ඊයේ ඈ දුටු                              බවට
මට සහතිකයි බිය වන්නේ තොපි               කුමට
ඈ දිව ඇවිත් නැග්ගේ උඹගේ                     රියට
ඈගේ පෙම්වතා යැයි වැරදිලා                    ඇයට





Monday, May 16, 2011

වේවා සෙතක් පුරවා සිත් මෙත් කරුණා.........................


පුන්සඳ පෑයූ ලෙස දුරුකර ඝණ                 අඳුර 
සියපත පිපෙන ලෙස පසුකර මඩ              වඟුර 
ලොවටම බෙදා දම් රස සිඳ බිඳ                 සසර 
පෑයූ හිරු ඔබයි බුදු හිමියනි                        අඹර


දඹදිව් තලේ ඉපදී රජ සැප                      හැරදා 
බුදු බව පසක් කෙරුවේ කෙලෙසුන්         පරදා 
මහා කරුණාව පතුරා සත්‍යය                   පහදා 
දෙසුවා දහම් සත හට කඳුළැල්                 පිසදා 


සෙත සැලසුවා අසරණ වූ                  මිනිසුන්ට 
මඟ පෙන්නුවා මේ සසරෙන්          ගැලවෙන්ට 
දුක උසුලනා මිනිසුන් ලොව          සැනසෙන්ට 
දෙසු දම් රසය ලොව පැතිරී             ඉතිරෙන්ට 


ගුණ කඳ බුදු හිමිගේ නෑ කෙලවර      වෙන්නේ 
ඒ ගුණ ගයන්නට නෑ වචනත්                දන්නේ 
එනමුත් හිමිට ගෞරවයක්               විලසින්නේ 
බුදු හිමි දෙසූ මඟ අප සැම දෙන            ගන්නේ 


සියලුම ලෝ සතන් සැනසෙන වෙසක්      දිනේ 
දෙදහස් හයසීය වසරයි අද                සමරන්නේ 
ඒ සැමරුමට හැමදෙන මුල් තැන           ගන්නේ 
ඒ සමගින්ම මේ ටික සිහියට                  ගන්නේ 


දන්සල් දීම, සැරසිලි වෙසඟේ                   කරන 
මල් සහ පහන් බුදු හිමියන් හට                   පුදන 
මේ හැමදේම ආමිස පිදුමට                    ගැනෙන 
මුල් තැන දෙමුද ප්‍රතිපත්තියටත්                 නිතින 


බුදු හිමි දෙසූ ලෙස ගෞරවයක්                   හිතක 
ඇත්නම් හිමි කෙරෙහි නොසැලී හැම         කලක 
යයි නම් හිමි දෙසූ මඟ නොඇලී                 දුකක 
එය පෙන්වාවි ගෞරව බුදුනට                    සිතක  


සියලුම දෙනා අද දින පින්කම්                   කරනා
ලැබිලා බුදු දහම් සඟ රුවනේ                   සරණා
මේ ලෝ තලේ සියලුම සත හට                වසනා 
වේවා සෙතක් පුරවා සිත් මෙත්                කරුණා

Sunday, May 8, 2011

කිමදෝ මවට එක දිනයක් වෙන් කරලා



දස මාසයක් කුස තුල අප බර                 උසුලා
දුක් විඳ දරා අප මෙලොවට බිහි              කරලා
සිරුරේ දුවන රුධිරය කිරි කර              පොවලා
ඇති දැඩි කළා දරුවන් හැමදේ               පුදලා


අම්මා නමැති දෙවඟන මෙලොවට         වැඩලා
හැඩ වැඩ කළා අපගේ ජිවිත                   ඔපලා
නිවසේ බුදුන් ලෙස ඇය හට නම්            තබලා
බුදුහිමි පවා ඇත මව් ගුණ කඳ               දෙසලා


උදයේ සවස මවගේ දෙපතුල                  අල්ලා
කිවත් අම්මගේ ගුණ කඳ වැඳ                 වැටිලා
සත්තයි ඇති නොවෙයි  මව් සෙනෙහස    ගයලා
උල්පත වගෙයි  සෙනහස නැත          වියෙකීලා


අම්මා වසාගෙන නිමි නැති ගුණ             ගලලා 
සැනසූ ලොවම  කරුණාවෙන් හිත         පුරලා
මෙතරම් උතුම් ගුණ කඳ අද සිහි            කරලා 
කිමදෝ මවට එක දිනයක් වෙන්           කරලා 


ඇගේ මුළු දිවිය දරුවන් හට කැප           කරලා 
දරුවන් නිසා කඳුළැලි සයුරක්              හෙලලා 
වසරක් තිස්සේ තම මව අමතක             කරලා 
කුමටද මිතුර මව් උපහාරය                     පුදලා 


අසරණ මහලු අම්මා ඇදගෙන                කුදලා 
ගෙන ගොස් ඇගේ පුතු මව මඩමට         දමලා 
මව් දින සැමරුමට ඔහු අද දුව               පැනලා 
කුමටද මෙවන් උන් මව් හට වැඳ            පුදලා 


බටහිර දේසේ මිනිසුන් දින වෙන්          කරලා 
සමරා සතුටු වන මුත් මව් ගුණ              ගයලා 
කුමටද අපිත් උන් පසු පස්සේ              වැටිලා 
සැමදා ගයමු ගුණ මව දෙපතුල            වැඳලා 


මව හට පියා හට දින දින වෙන්            කරලා 
ජලයට ගහ කොළට තව තව දින          හදලා 
කුමටද දවස් තුන් සිය හැට පහ            බෙදලා 
නොසිතා සිටියි නම් මේ ගැන අපි        උඹලා


දින වෙන් කෙරුම නෑ නොවැ වැදගත්   වීලා 
වටිනවා සැලකුවොත් සැමදා සිහි        කරලා 
මව සහ පියා දෙපලම සතුටින්             තියලා 
සැමදා රකිමු පරිසරයත් වෙර            යොදලා 

Monday, May 2, 2011

අවසර දෙන්න ගෙතුමට කවි...............

කවියට හිතේ ඇතිවුන ලැදිකම               හන්දා
ඉඳ හිට නැඟුණු සිතුවිලි කවි පද             බැන්දා
ඒ කවිවලට ඉඩකඩ මදිවද                     මන්දා 
ගොඩගේ කවි කෑලි බ්ලොගයක් ඇත    කැන්දා


මෙතුවක් කලක් ගෙතු කවි පලවී          ඇත්තේ  
ගොඩයා ලියූ වංහුං බ්ලොග් එක          පැත්තේ 
මින් මතු ඒ පිටුවේ කවියට ඉඩ            නැත්තේ 
මේ අඩවියෙන් කවියට ඉඩකඩ             ගත්තේ 


සිතුවිලි හදේ කවි පද වැල්                 අමුණාවී 
ඒ කවි වලින් මේ පිටුවම                    පිරවෙවී 
දොස් දුටු විටදී මා හට                   අනුකම්පාවී
අවසර දෙන්න ගෙතුමට කවි තව            රසවී